हमर माटी हमर गोठ

25 अक्टू॰ 2016

आँव लाज रखबे

हे नटवर नन्दलाल मोरे, आँव लाज रखबे।
बड़गे चारो मुड़ा पाप हा, आ अब तँय हरबे।।

बड़े बड़े सकुनी इहा हवे, चाल चलत अपने।
फेकत हावे जाल भरम के, रखथे कपट मने ।।

करथे अधरम हा राज इहा, दुर्योधन बनके।
धरम राज ला लूटत हावे, छल माया करके।।

करथे अत्याचार दुशासन, खींचत हे लुगरा।
बेटी माई होवत हावे, रोज इहा उँघरा।।

आँखी देखत बइठे मनखे, न्याय बने अँधरा।
साँच झूठ के फरक कहाँ हे, होवत हे झगरा।।

भाई भाई के बैरी हावे, कपट भरे मन मा।
आज ददा दाई ला मनखेे, फेकत हे बन मा।।

मन मा आस हवे आके तै, लाज मोर रखबे।
कलजुग के सबो पाप ला तै , आव नास करबे।।

-हेमलाल साहू
ग्राम गिधवा, पोस्ट नगधा
तहसील नवागढ़, जिला बेमेतरा
(छत्तीसगढ़) मो. 9977831273

जग लाव अँजोरी

बार अपन मनके दीया ला, जग लाव अँजोरी।
सबो डहर परकास फैलही, मिटही अँधियारी।।

जोड़व नाता कुदरत संगी, जग बदव मितानी।
हरियर हरियर दिखही धरती, मत कर नादानी।।

हरियर होही मन हा सबके, रखव बचा पानी।
माटी सेवा मा तन मन राखव, कर बने किसानी।।

पर उपकार पर सेवा संगी, कर दव जिनगानी।
रइहव सुख के छइहा संगी, बोल मीठ बानी।।

कायर कपट छोड़ संगी, हेम करत विनती।
प्रेम भाव से मन मा जलाव, दीया सुरहूती।।

लावव नवा अँजोर (हेम के दोहे)

ऊवत बेरा के जिहाँ, परथन सबझन पाँव।

बढ़ निक लागे गाँव हा, हवे मया के छाँव।।

सुघ्घर दाई के मया, महिमा हवय अपार।

अपन पीर अंतस रखें, हमला देत दुलार।।

बनके दीया मेटलव, जग के सब अँधियार।

लावव नवा अँजोर गा, मन मा दीया बार।।

बइला कस जाँगर हवय, ओला कसके पेर।

दूर गरीबी ला करँय, मिलय छाँव सुख फेर।।

शाबासी टॉनिक हमर, लागे अड़बड़ मीठ।

मन करथे चंगा भला, देख ठठा के पीठ।।

अवगुन करथे दूर गा, गोठ करू कर भोग।

करू करेला हा रखै, जइसे तन ल निरोग।।

-हेमलाल साहू

ग्राम गिधवा, पोस्ट नगधा

तह. नवागढ़, जिला बेमेतरा(छ.ग.)

17 अक्टू॰ 2016

जय जय हो मात भवानी (बिस्नू पद छन्द )

जय जय हो मात भवानी, खोल द्वार मनके।
बारव दीया करव आरती, भाव भजन धरके।।

तोर अगोरा हावे घर मा, आ दाई बनके।
मया दया भाव धरे आहू, आस हवे सबके।।

पहली बहनी आय सारदा, ज्ञान भरय मनमें।
दूसर बहनी आवय गौरी, देवव बल तन में।।

तीसर बहनी आवय लछमी, धन लावय धरके।
चउथा बहनी आवय काली, नाश करै जर के।।

आय पाँचवा बहनी दुरगा, घर पावन दमके।
सब संग देवता मन लावय, दरसक रुप धरके।।

गुन गावय सब तोर भवानी, जय जय कार करे।
मोरे मन पावन रहै सदा, तँय बल बुद्धि भरे।।

15 अक्टू॰ 2016

@बनबे भला इंसान गा@

रखबे मया तँय संग मा, करु छोड़ के तँय गोठ गा।
तँय राखले बिस्वास ला, मन होय जी तब पोठ गा।
अभिमान ला तँय छोड़ के, मन राख ले तँय प्रेम गा ।
करबे भला मन बाँध ले, जग आस हे हर टेम गा।।

सबला मिलै अधिकार हा, सुन बात सबके हेम गा।
तँय मीठ बोली बोल ले, रखलव मया हर टेम गा।।
तँय मान अउ सम्मान ला, करबे दया अउ दान गा।
तँय राखबे सबके ख्याल ला, बनबे भला इंसान गा।।

14 अक्टू॰ 2016

मन पाप ला तँय तो भगा

मन में बसे रावन हवे, जँह    देख   ओकर   राज हे।
हर रोज हे दिखते इहाँ, बिटिया लुटावत   लाज   हे।।
मन मा बसे दसशीश के, तँय   पाप ला   तुरते   जला।
रख लाज बहिनी के सदा, तब होय जगके जी भला।।

मन भाप रे तँय जाग रे, मन ला लगा तँय मान रे।
प्रभु जाप ला कर साथ मा, अब तै समे पहचान रे।।
चल साथ रे कर काम रे, तँय भाग ला चल रे जगा।
चल बोल रे तँय साँच रे, मन पाप ला तँय तो भगा।।

@बिसवास ला तँय राख ले@

चल आ सँगी मन ला लगा, तँय हाथ बूता मा लमा।
तँय चल पसीना गार के, चल पून्य पूँजी ला जमा।।
तँय छोड़ दे मन मोह ला, चल नाव सुघ्घर तँय कमा।
कर दान तँय रखबे दया, करबे सबै गलती छमा।।

तँय पेर जाँगर ला कमा , चल भाग ला सुघ्घर जगा।
तँय राख ले उपवास ला, चल रोग ला मनके भगा।।
प्रभु जाप ला तँय कर बने, चल ध्यान ला मन मा लगा।
बिसवास ला तँय राख ले, नइ होय जिनगी मा दगा।।

6 अक्टू॰ 2016

ददरिया मा राग धरके, चलव गाबो गीत रे।
आव करमा नाचबो मिल, अपन सब झन मीत रे।।
हमन माटी गुन ल गाबो, पहिर चोला आज रे।
आव करबो अपन संगी, चलव सुघ्घर काज रे।।

हमर घासीदास बाबा, सत्य करय बखान रे।
छोड़ संगी जात पाते, बनव सब इंसान रे।।
चलय पंथी थाप माँदर, करले कसके नाच रे।
गात महिमा गीत मा तो, सब बता दे साँच रे।।

@मार नोनी कोख मा झन@

मार नोनी कोख मा झन, आन दव संसार मा।
भेद भाव ल छोड़ संगी, रखव अपन दुलार मा।।
हवय नोनी हमर बाबू, एक दूनो जान लौ।
हवय घर के आन नोनी, तुमन संगी मान लौ।।

देख नोनी हा बढ़ाये, देश के तो शान ला।
सोच बदलव अपन संगी, दव बने सम्मान ला।।
देख नोनी अपन सुघ्घर, घर रखै संस्कार मा।
मीठ बोलय गोठ नोनी, बाँध रखय दुलार मा।।

5 अक्टू॰ 2016

गीतिका छन्द

हमर भुइँया हमर दाई,   तँय बिराजै गाँव मा।
मोर सुघ्घर हवय जिनगी, तोर अँचरा छाँव मा।।
आँव दाई तोर बेटा,   करव   तोर बखान ला।
तोर दाई नाव लेवव,   रखव   मेहा मान ला।।

अपन संगी अपन साथी, आँव करबो काम ला।
छोड़ चिन्ता अपन फलके, रुख लगाबो आम ला।।
आँव संगी मिल बनाबो, सरग जइसन गाँव ला।
अपन जाँगर पेर संगी, हम जगाबो नाव ला।।

2 अक्टू॰ 2016

@हे दाई बिमला@

हे दाई बिमला, सँग दे हमला, तोर सदा में, ध्यान धरव।
मात शैलपुतरी, कालरातरी, सदा बिराजे, कण्ठ रहव।।
जय मात भवानी, जग कलयानी, पाप नासनी, पाप हरव।
दाई कपालनी, भय ला हरनी, सब विपदा ला, दूर करव।।

1 अक्टू॰ 2016

रूपमाला छंद

समय भागे देख पल्ला, कभू रुक न पाय।
काल ककरो आय संगी, छैक न छेकाय।।
छोड़ चिंता अपन फलके, बने जाँगर पेर।
मेहनत मा भाग्य बनथे, समय के हे फेर।।

29 सित॰ 2016

@रूपमाला छन्द (मदन छन्द)@

मोर माटी मोर दाई, तँय रखै हस नेम।
मोर जिनगी तोर कोरा, मा बसे हर टेम।
तोर सेवा करवँ दाई, परन करथंव हेम।
मोर जिनगी हवै अरपन, राखबे तँय प्रेम।

दलित कोदूराम ला हे, मोर सत परनाम।
राख मनमे नाव गुरु के, सफल होये काम।
पेर जाँगर अपन संगी, करवँ मनमे ध्यान।
हे अपारे देख महिमा, गुरु दियै सब ज्ञान।

राख सबसे प्रेम संगी, छोड़ तँय अभिमान।
पेर जाँगर अपन संगी, तोर बाढ़य शान।
सीख लेवव बने संगी, करवँ मनमा ध्यान।
मेहनत बिन कहाँ मिलथे, कोउनो ला ज्ञान।

26 सित॰ 2016

बरवै छंद

हेमलाल नाव हवै, गिधवा गाँव।
चिरई करै बसेरा, पीपर छाँव।।

माँ शीतला बिराजे, तरिया पार।
मया दया दाई के, हवै अपार।।

माटी सेवा भैया, करै किसान।
नागर अऊ तुतारी, हे पहचान।।

ऊवत सूरुज करथे, सब परनाम।
होत बिहनिया जाथे, संगी काम।।

जियत मरत ले संगी, गुन ला गाव।
माटी सेवा करके, समय बिताव।।

राख अपन छोटे के, संगी ध्यान।
करव अपन ले बड़का, के सम्मान।।

आपस में राखव जी, सबसे प्रेम।
लगा काम में मनला, तै हर टेम।।

जिनगी मा झन बनहू, कभू अलाल।
समय कीमती हावे, राखव ख्याल।।

एक बरोबर मानुस , सबला जान।
दुनियाँ मा पूजौ सच , अउ ईमान।।

संगी सबले हावे, बड़का ज्ञान।
साधव अंतस मा रख, प्रभु के ध्यान।।

-हेमलाल साहू
ग्राम गिधवा, पोस्ट नगधा
तहसील नवागढ़, जिला बेमेतरा
(छत्तीसगढ़) मो न 9977831273

कज्जल छंद

सबो डहर हे लूट पाट।
बने रथें साहेब लाट।।
मानवता ला देत पाट।
खोल चोर सबके कपाट।।

मिलै न बिन सबूत चोर।
न्याय हवे अंधरा मोर।।
घुमय चोर हा गली खोर।
कहाँ पुलिस ला हवै सोर।

करत परोसी हवै खोट।
जबले देखे हवै नोट।।
भाई के मन होय छोट।
पइसा खातिर बिके वोट।।

गार पसीना करव काम।
अपन समे के हाथ थाम।
रही जगत मा तोर नाम।
पेरव जाँगर छाँव घाम।

आवव देवव जी सबो साथ।
काम बाँट सब अपन हाथ।।
सबो डहर गढ़ नवा गाथ।
धरती सेउक नवा माथ।।

23 सित॰ 2016

@आवव रे संगी@

आवव रे संगी मिल, करबो काम।
भुइँया सरग बनाबो, परभू धाम।।

करम धरम रहै सदा, बन परकास।
सच के पूजा होवय, छुवै अगास।।

सुख अउ शांति रहै जी, मन संतोष।
दाई रमा बिराजे, भरही कोष।।

पाप होय झन संगी, रखबो ख्याल।
परभू के गुन गाबो, टर ही काल।।

जात पात छोड़ रहै, सबो समान।
मनखे मनखे भाई, इहि पहचान।।

बोलव प्रेम मया के, सुघ्घर बोल।
सबो कटै माया जी, मन ला खोल।।

नारी, लछमी, दुरगा, देबी जान।।
होय कभू झन संगी, जग अपमान।।

सुघ्घर सरग बनाबो, देवव साथ।
करबो सब मिल बूता, बाँटव हाथ।।

-हेमलाल साहू
ग्राम-गिधवा, पोस्ट नगधा
तहसील नवागढ़, जिला बेमेतरा
(छत्तीसगढ़) मो. 9977831273

22 सित॰ 2016

@सुघ्घर हे गाँव@

सुघ्घर हे गाँवे, सबला भावे, संगी बड़ निक लागे।
हरियर रुख राई, देखव भाई, सबके मन मोहागे।।
खेती अउ खारे, नदिया पारे, संगी अबड़ सुहाये।
पीपर के छाँवे, ममता हावे, माटी प्रेम जगाये।।

20 सित॰ 2016

@अब डंका बाजय@

अब डंका बाजय, बैरी भागय, तांडव काल मचाबो।
सब मार अधरमी, टार कुकरमी, भुइँया सरग बनाबो।।
भारत के पीरा, खोवत हीरा, कइसे कभू भुलाबो।
भारत के झंडा, लगही डंडा, गाड़ पाक मा आबो।।

@शिक्षा ला बगराबो@

तज जात पात ला, मान बात ला, आगू बड़ जा भाई।
सब संग जोर के, गाँव खोर के, रद्दा बने बनाई।।
आवौ सब पढ़बो, आगू बढ़बो, जिनगी सफल बनाबो।
सब गाँव म जाबो, अलख जगाबो, शिक्षा ला बगराबो।।

@शिक्षा ला बगराबो@

19 सित॰ 2016

@पढ़ ले दू आखर@

पढ़ ले दू आखर, विद्या सागर, ज्ञान बाँट तैं लेबे।
सुन दान दया के, संग मया के, सीख सबो ला देबे।।
दाई बर जीबो, सेवा करबो, वोकर मान बचाबो।।
चल ताने सीना, बहै पसीना, बैरी मार भगाबो।।

@छोड़व मन माया@

छोड़व मन माया, माटी काया, झन करहूँ अभिमाना।
चारे दिन जिनगी, सबला संगी, एक जगह हे जाना।।
संतोष रखै सुख, मिलै नहीँ दुख, अपन करम के भागे।
मन कतको जागे, कतको भागे, काल सबो ले आगे।।

18 सित॰ 2016

बरखा रानी

आँसो सब तरिया, नरवा-नदिया, जम्मो सुख्खा देख परे।
सुन बरखा रानी, देख परानी, बिन पानी सुन झार मरे।।
देखव सब गाँवे, नइये छाँवे, रुख राई मन, ठाड़ झुखे।
कर बिनती तोला, कहिथे चोला, आके करबे, दूर दुखे।।

-हेमलाल साहू
ग्राम गिधवा, पोस्ट नगधा
तहसील नवागढ़, जिला बेमेतरा
(छ्त्तीसगढ़) मो. 9977831273

सब आवव भाई पड़े लगाई

झन काटव भाई, रुख अउ राई, सबके संगी, ताय कहै।
सब आवव भाई, पेड़ लगाई, कुदरत सब ला भाय रहै।।
निरमल पुरवाई, मानौ भाई, परदूसन ला दूर करै।।
छोड़ौ सँगवारी, मोटर गाड़ी, जौन जहर ला, रोज भरै।।

निरमल पुरवाई, सुघ्घर भाई, गाँव गाँव मा देख बहै।
बन कुदरत संगी, रहै न तंगी, हरदम हरियर, प्रेम रहै।।
माटी के सेवा, पाबो मेवा, तोरे जस के फूल खिलै।
बस हँसी खुशी मा, अब जिनगी मा दया मया के छाँव मिलै।।

16 सित॰ 2016

त्रिभंगी छंद

मन मोर गाँव ला, नीम छाँव ला, प्रेम भाव ला, याद करै।
दाई बाबू के, बंधु बहिन के, सुरता करके, नयन भरै।।
सुघ्घर हे जिनगी, नइये तंगी, मिलके संगी तीर रहै ।
घर द्वार मया के, दान दया के, नेह प्रीत के धार बहै।।

बिदाई

हे गणपति बप्पा, चप्पा चप्पा, सब झन तोरे, ध्यान करैं।
माटी के काया, छोड़ै माया, प्रभुजी सबके पाप हरै।।
हे तोर बिदाई, बड़ दुखदाई, तँय हम सबला छोड़ चले।
मन सबके भींजत, आँसू सींचत, आस दरस तव फेर मिले।।

-हेमलाल साहू
ग्राम गिधवा, पोस्ट नगधा
तहसील नवागढ़, बेमेतरा
(छत्तीसगढ़) मो.9977831273

14 सित॰ 2016

जय माँ सरस्वती

हे मात भारती, करँव आरती, मन के दीया, बार सबे।
हे हंस वाहिनी, ज्ञान दायिनी, खोलव मनके द्वार दबे।।
तैं माता जगती, करथौं भगती, धरथौं तोरे, ध्यान महूँ।
दाई सरसत्ती, माता सत्ती, देदे मोला, ज्ञान तहूँ।।

13 सित॰ 2016

@जय जय हनुमन्ता@

जय जय हनुमन्ता, तँय बलवन्ता, राम भगत जग, कष्ट हरौ।
रख शक्ति अनंता, निशचर हन्ता, सबके मनके पाप हरौ।।
मोरे भगवाने, जय हनुमाने, उर म विराजे , ज्ञान भरौ।।
हे राम दुलारे, सबके प्यारे, मम उर नित तुम, वास करौ।

-हेमलाल साहू

9 सित॰ 2016

@त्रिभंगी छंद@

सुघ्घर परभू के, चरन सरन मा, रोज नाम ला, जाप करौ
मनके मनखेे मा, भेद भाव कर, संगी हो झन पाप करौ।।
तन मन अरपन कर, राख मया ला, मन मा परभू, ध्यान करौ।
सब सुनथे अरजी, अंतर्यामी, अपन बसा मन, गान करौ।।

बिद्यायल जाबो, लिखबो पढ़बो, सुघ्घर पाबो, ज्ञान बनै।
चल आगू बढ़बो, जिनगी गढ़बो, करके परभू, ध्यान बनै।
जोड़व नाता ला, अपन सबो से, पास रहव मिल
एक बनै।
करले धरम करम, झन करव सरम, कर दान दया, नेक बनै।

दाई बाबू के, पूजा करबो, जिनगी पाबो, अपन सुखी।
गुरु चरने रहिके, ज्ञान ल पाबो, कटथे पापे, अपन दुखी।।
तै रखबे बढ़िया, धरम करम ला, सुघ्घर करबे, काज बनै।
तै करबे सेवा, पाबे मेवा, दया मया ला, साज बनै।।

4 सित॰ 2016

चौपई छंद

देखव संगी गाये फाग। कोंदा मनमें धरके राग।
दीया ला मनमें ओ बार। दैय अंधरा गीता सार।।

रखके मनमें परभू प्रीत। भयरा सुने भक्ति के गीत।।
देख धरै परभू के द्वार। चलै लेड़गा भव से पार।।

सुनलव संगी परभू गान। रखले संगी ओकर मान।
हो जाबे तै भव से पार। पढ़ले संगी जिनगी सार।

-हेमलाल साहू
ग्राम गिधवा, पोस्ट नगधा
तहसील -नवागढ़, जिला बेमेतरा
(छत्तीसगढ़), मो. 9977831273