हेमलाल नाव हवै, गिधवा गाँव।
चिरई करै बसेरा, पीपर छाँव।।
माँ शीतला बिराजे, तरिया पार।
मया दया दाई के, हवै अपार।।
माटी सेवा भैया, करै किसान।
नागर अऊ तुतारी, हे पहचान।।
ऊवत सूरुज करथे, सब परनाम।
होत बिहनिया जाथे, संगी काम।।
जियत मरत ले संगी, गुन ला गाव।
माटी सेवा करके, समय बिताव।।
राख अपन छोटे के, संगी ध्यान।
करव अपन ले बड़का, के सम्मान।।
आपस में राखव जी, सबसे प्रेम।
लगा काम में मनला, तै हर टेम।।
जिनगी मा झन बनहू, कभू अलाल।
समय कीमती हावे, राखव ख्याल।।
एक बरोबर मानुस , सबला जान।
दुनियाँ मा पूजौ सच , अउ ईमान।।
संगी सबले हावे, बड़का ज्ञान।
साधव अंतस मा रख, प्रभु के ध्यान।।
-हेमलाल साहू
ग्राम गिधवा, पोस्ट नगधा
तहसील नवागढ़, जिला बेमेतरा
(छत्तीसगढ़) मो न 9977831273
कोई टिप्पणी नहीं:
एक टिप्पणी भेजें