हमर माटी हमर गोठ

हे नटवर नन्दलाल मोरे, आँव लाज रखबे। बड़गे चारो मुड़ा पाप हा, आ अब तँय हरबे।। बड़े बड़े सकुनी इहा हवे, चाल चलत अपने। फेकत हावे जाल भरम के, रखथे कपट मने ।। करथे अधरम हा राज इहा, दुर्योधन बनके। धरम राज ला लूटत हावे, छल माया करके।। करथे अत्याचार दुशासन, खींचत हे लुगरा। बेटी माई होवत हावे, रोज इहा उँघरा।। आँखी देखत बइठे मनखे, न्याय बने अँधरा। साँच झूठ के फरक कहाँ हे, होवत हे झगरा।। भाई भाई के बैरी हावे,  कपट भरे मन मा। आज ददा दाई ला मनखेे, फेकत हे बन मा।। मन मा आस हवे आके तै, लाज मोर रखबे। कलजुग के सबो पाप ला तै , आव नास करबे।। -हेमलाल साहू ग्राम गिधवा, पोस्ट नगधा तहसील नवागढ़, जिला बेमेतरा (छत्तीसगढ़) मो. 9977831273

बार अपन मनके दीया ला, जग लाव अँजोरी। सबो डहर परकास फैलही, मिटही अँधियारी।। जोड़व नाता कुदरत संगी, जग बदव मितानी। हरियर हरियर दिखही धरती, मत कर नादानी।। हरियर होही मन हा सबके, रखव बचा पानी। माटी सेवा मा तन मन राखव, कर बने किसानी।। पर उपकार पर सेवा संगी, कर दव जिनगानी। रइहव सुख के छइहा संगी, बोल मीठ बानी।। कायर कपट छोड़ संगी,  हेम करत विनती। प्रेम भाव से मन मा जलाव, दीया सुरहूती।। -हेमलाल साहू ग्राम गिधवा, पोस्ट नगधा तहसील नवागढ़, जिला बेमेतरा (छत्तीसगढ़) मो. 9977831273

ऊवत बेरा के जिहाँ, परथन सबझन पाँव। बढ़ निक लागे गाँव हा, हवे मया के छाँव।। सुघ्घर दाई के मया, महिमा हवय अपार। अपन पीर अंतस रखें, हमला देत दुलार।। बनके दीया मेटलव, जग के सब अँधियार। लावव नवा अँजोर गा, मन मा दीया बार।। बइला कस जाँगर हवय, ओला कसके पेर। दूर गरीबी ला करँय, मिलय छाँव सुख फेर।। शाबासी टॉनिक हमर, लागे अड़बड़ मीठ। मन करथे चंगा भला, देख ठठा के पीठ।। अवगुन करथे दूर गा, गोठ करू कर भोग। करू करेला हा रखै, जइसे तन ल निरोग।। -हेमलाल साहू  ग्राम गिधवा, पोस्ट नगधा तह. नवागढ़, जिला बेमेतरा(छ.ग.) 

जय जय हो मात भवानी, खोल द्वार मनके। बारव दीया करव आरती, भाव भजन धरके।। तोर अगोरा हावे घर मा, आ दाई बनके। मया दया भाव धरे आहू, आस हवे सबके।। पहली बहनी आय सारदा, ज्ञान भरय मनमें। दूसर बहनी आवय गौरी, देवव बल तन में।। तीसर बहनी आवय लछमी, धन लावय धरके। चउथा बहनी आवय काली, नाश करै जर के।। आय पाँचवा बहनी दुरगा, घर पावन दमके। सब संग देवता मन लावय, दरसक रुप धरके।। गुन गावय सब तोर भवानी, जय जय कार करे। मोरे मन पावन रहै सदा,  तँय बल बुद्धि भरे।। -हेमलाल साहू ग्राम गिधवा, पोस्ट नगधा तहसील नवागढ़, जिला बेमेतरा (छत्तीसगढ़) मो. 9977831273

रखबे मया तँय संग मा,  करु छोड़ के तँय गोठ गा। तँय राखले बिस्वास ला, मन होय जी तब पोठ गा। अभिमान ला तँय छोड़ के, मन राख ले तँय प्रेम गा । करबे भला मन बाँध ले, जग आस हे हर टेम गा।। सबला मिलै अधिकार हा, सुन बात सबके हेम गा। तँय मीठ बोली बोल ले, रखलव मया हर टेम गा।। तँय मान अउ सम्मान ला, करबे दया अउ दान गा। तँय राखबे सबके ख्याल ला, बनबे भला इंसान गा।। -हेमलाल साहू ग्राम गिधवा, पोस्ट नगधा तहसील नवागढ़, जिला बेमेतरा (छत्तीसगढ़) मो. 9977831273

मन में बसे रावन हवे,  जँह    देख   ओकर   राज  हे। हर रोज हे दिखते इहाँ, बिटिया  लुटावत   लाज   हे।। मन मा बसे दसशीश के, तँय   पाप  ला   तुरते   जला। रख लाज बहिनी के सदा, तब होय जगके  जी भला।। मन भाप  रे  तँय  जाग रे, मन ला लगा तँय मान रे। प्रभु जाप ला कर साथ मा, अब तै  समे पहचान रे।। चल साथ रे कर काम रे, तँय भाग ला चल रे जगा। चल बोल रे तँय साँच रे, मन पाप ला तँय तो भगा।। -हेमलाल साहू ग्राम गिधवा, पोस्ट नगधा तहसील नवागढ़, जिला बेमेतरा (छत्तीसगढ़) मो. 9977831273

चल आ सँगी मन ला लगा, तँय हाथ बूता मा लमा। तँय चल पसीना गार के,  चल पून्य पूँजी ला जमा।। तँय छोड़ दे मन मोह ला, चल नाव सुघ्घर तँय कमा। कर दान तँय रखबे दया,  करबे सबै गलती  छमा।। तँय पेर जाँगर ला कमा , चल भाग ला सुघ्घर जगा। तँय राख ले उपवास ला,  चल रोग  ला मनके भगा।। प्रभु जाप ला तँय कर बने, चल ध्यान ला मन मा लगा। बिसवास ला तँय राख ले, नइ  होय जिनगी मा दगा।। -हेमलाल साहू ग्राम गिधवा, पोस्ट नगधा तहसील नवागढ़, जिला बेमेतरा (छत्तीसगढ़) मो. 9977831273

ददरिया मा राग धरके,  चलव   गाबो   गीत   रे। आव करमा नाचबो मिल, अपन सब झन मीत रे।। हमन माटी गुन ल गाबो,  पहिर  चोला  आज रे। आव करबो अपन संगी, चलव  सुघ्घर  काज रे।। हमर घासीदास बाबा, सत्य करय बखान रे। छोड़ संगी जात पाते, बनव  सब  इंसान  रे।। चलय पंथी थाप माँदर, करले कसके नाच रे। गात महिमा गीत मा तो, सब बता दे साँच रे।। -हेमलाल साहू ग्राम गिधवा, पोस्ट नगधा तहसील नवागढ़, जिला बेमेतरा (छत्तीसगढ़) मो. 9977831273

मार नोनी कोख मा झन, आन दव संसार मा। भेद भाव ल छोड़ संगी, रखव अपन दुलार मा।। हवय नोनी हमर बाबू, एक   दूनो  जान  लौ। हवय घर के आन नोनी, तुमन संगी मान लौ।। देख नोनी हा बढ़ाये,   देश  के  तो  शान  ला। सोच बदलव अपन संगी, दव बने सम्मान ला।। देख नोनी अपन सुघ्घर, घर रखै संस्कार मा। मीठ बोलय गोठ नोनी, बाँध रखय दुलार मा।। -हेमलाल साहू ग्राम गिधवा, पोस्ट नगधा तहसील नवागढ़, जिला बेमेतरा (छत्तीसगढ़) मो. 9977831273

हमर भुइँया हमर दाई,   तँय  बिराजै  गाँव मा। मोर सुघ्घर हवय जिनगी, तोर अँचरा छाँव मा।। आँव दाई तोर बेटा,   करव   तोर  बखान ला। तोर दाई नाव लेवव,   रखव   मेहा  मान ला।। अपन संगी अपन साथी, आँव करबो काम ला। छोड़ चिन्ता अपन फलके, रुख लगाबो आम ला।। आँव संगी मिल बनाबो, सरग जइसन गाँव ला। अपन जाँगर पेर संगी,  हम  जगाबो   नाव  ला।। -हेमलाल साहू ग्राम गिधवा, पोस्ट नगधा तहसील नवागढ़, जिला बेमेतरा (छत्तीसगढ़) मो. 9977831273

हे दाई बिमला, सँग दे हमला, तोर सदा में, ध्यान धरव। मात शैलपुतरी, कालरातरी, सदा बिराजे, कण्ठ रहव।। जय मात भवानी, जग कलयानी, पाप नासनी, पाप हरव। दाई कपालनी, भय ला हरनी, सब विपदा ला, दूर करव।। -हेमलाल साहू ग्राम गिधवा, पोस्ट नगधा तहसील नवागढ़, जिला बेमेतरा (छत्तीसगढ़) मो. 9977831273

समय भागे देख पल्ला, कभू रुक न पाय। काल ककरो आय संगी, छैक न छेकाय।। छोड़ चिंता अपन फलके, बने जाँगर पेर। मेहनत मा भाग्य बनथे, समय के हे फेर।। -हेमलाल साहू ग्राम गिधवा, पोस्ट नगधा तहसील नवागढ़, जिला बेमेतरा (छत्तीसगढ़) मो. 9977831273