हेम के दोहे (बाल जनऊला)
नाच नचावँन अंगरी, काम सबो के आँन।
सारी जग के बात ला, ले पहुँचावँन कान।।
संग दिखे अंजोर मा, फेर चलय ना साँस।
हाथ लगा आवय नहीं, अंधियार मा नास।।
बिन संगी आधार ना, जोड़ी बिन बेकार।
पहरा देवय बैठ के, असली पहरेदार।।
बिन बोले पहिचान ले, पावय लाड दुलार।
चोर उचक्का देख के, भागय उल्टा द्वार।।
एक गोल डिब्बा भरे, बारहठन के अंग।
तीन सिपाही सँग चले, चढ़े समे के रंग।।
पन्ना अपन समेट के, भर रखथे भंडार।
मोती दाना खोज के, मन के दीया बार।।
गार पसीना सींचथे, उठथे होत बिहान।
लावय हरियर सोनहा, कोन हरे पहिचान।।
हरियर थाली ले भरे, पहिरे बाली सोन।
चार मुड़ा ले डाड़ हे, बता सखी ये कोन।।
जिनगी चलथे साथ मा, जेकर धरके संग।
आवय जावय रोज के, अपन चढ़ावय रंग।।
नान्हे दाना पेट मा, धर रखथे जग छाँव।
बड़का हो फल-फूल दे, बूझव संगी नाँव।।
उत्तर:-1. मोबाइल, 2. छइहाँ (परछाई), 3. तारा-कूची (ताला-चाबी), 4. कुकुर (कुत्ता), 5. घड़ी, 6. पोथी (किताब), 7. किसान, 8. खेती-खार (खेत-खलिहान), 9. दिन-रात, 10. बीजा (बीज)
रचनाकार - हेमलाल साहू
चिरई के गाँव - गिधवा, जिला बेमेतरा
