छन्न पकइया छन्न पकइया, बनही अमर कहानी।
बाँधे राख मया के रिस्ता, रखले मान मितानी।।
छन्न पकइया छन्न पकइया, मिलके आगू जाबो।
सुख दुख मा रहिके सँगवारी, जिनगी साथ निभाबो।
छन्न पकइया छन्न पकइया, आवय झन अभिमानी।
गार पसीना हमन संगवारी, करबो बने किसानी।।
छन्न पकइया छन्न पकइया, आवव जोश जगाबो।
मिलके सँगवारी आवव हम, सुघ्घर देश बनाबो।।
छन्न पकइया छन्न पकइया, आवव गाबो गाना।
मोरे मितवा मोरे हितवा, तारे ना रे ना ना।।
-हेमलाल साहू
ग्राम गिधवा, पोस्ट नगधा
तहसील नवागढ़, जिला बेमेतरा
टिप्पणियाँ